Rêxistina Mafên Mirovan a Îranê: 253 xwepêşanderan jîyana xwe ji dest daye

Li Rojhilatê Kurdistanê û Îranê xwepêşandanên li dij rêjîma Îranê berdewam in.
Roj bi roj hejmara qurbanîyên xwepêşandanan zêdetir dibe, lewra polîsên îranî bi çek û guleyan dirêjî xwepêşanderan dikin.
Rêxistina Mafên Mirovan a Îranê ragihand ku heta niha di xwepêşadanên li Rojhilatê Kurdistanê û Îranê de 253 kesan jîyana xwe ji dest daye, di nav de 34 zarok û 19 jin in.
Der barê hejmara qurbanîyan de, Birêveberê Rêxistina Mafên Mirovan a Îranê Mihemed Emîrî Muxedam rexne li civaka navdewletî kir û got: “Neteweyên Yekbûyî û civaka navneteweyî bi tu rengî pişta xwepêşanderên sivîl negirtiye.”
Muxedam her wiha metirsîya xwe anî zimên û piştrast kir ku metirsîya pêkhatina komkujîyan, “metirsîyeka jidil û di cih de ye”.
Ev xwepêşandan ji 16ê îlonê ve, ji roja kuştina jina kurd Jîna Emînî ve, li Rojhilatê Kurdistanê û Îranê gur bûne.