El-Miqdad bo Sputnîkê: Li barê normalkirina pêwendîyên Şam û Enqereyê tu dan û standin nînin

El-Miqdad bo Sputnîkê: Li barê normalkirina pêwendîyên Şam û Enqereyê tu dan û standin nînin

Target – Qamişlo
Wezîrê Karûbarên Derve yê Sûrîyayê, Feysel El-Miqdad, duh înê, 23ê îlonê, ji Ajansa Sputnîkê ya girêdayî Hikûmeta Rûsyayê re got ku halê hazir li barê normalkirina pêwendîyên Şam û Enqereyê tu dan û standin nînin.
El-Miqdad eşkere kir ku tu pêwendî li ser asta wezaretên karûbarên derve yên her du dewletan jî tuneye.
Wezîrê Hikûmeta Şamê teqez kir wekî Tirkîya keleman dixe pêş prosesa lihevkirinê ya li gor çarçoveya Astanyê.
Li gor Feysel El-Miqdad, çareserîya şerê Sûrîyayê tenê li gor lihevkirinên Astanayê dikare biçe serî.
Hêjayî gotinê ye ku berî demekê çar çavkanîyên cuda ji Reutersê re eşkere kiribû ku serokê saloxgerîya Tirkîyayê Hakan Fîdan û serokê saloxgerîya Hikûmeta Şamê Elî Memlûk hefteya borî li Şamê li hev civîyabûn.
Rojnameya El-Wetenê ya girêdayî Hikûmeta Şamê jî, sêşema borî got ku hin çavkanîyên dîplomatîk ên rojavayî dîyar kiriye wekî dan û standinên di navbera Sûrîya û Tirkîyayê de, di demeka nêz de, dê bigihên asta gotûbêjên siyasî.
Berî wê, Wezareta Karûbarên Derve ya Rûsyayê jî ragihandibû ku Moskova destekê dide hevdîtina wezîrên karûbarên derve yên Sûrîya û Tirkîyayê û dikare di vî warî de alîkar be.