YPJ keçeka din a êzîdî ji nav destên daişîyên Kampa Holê rizgar dike

YPJ keçeka din a êzidî ji nav destên daişîyên Kampa Holê rizgar dike

Target – Qamişlo

Yekîneyên Parastina Jinê (YPJ) îroj sêşemê ragihand ku wan keçeka din a êzidî ji nav destên daişîyên Kampa Holê rizgar kir.
YPJyê got ku şervanên jin di roja 20emîn a qonaxa duyem a Pêngava Mirovahî û Ewlehîyê ya li Kampa Holê de keçeka êzidî ya bi navê Sewsen Heyder ji nav pencên daişîyan xilas kir.
Sewsena 24 salî berî neh salan, wate di dema komkujîya DAIŞê ya li dij êzidîyan de, ji devera Şingalê hatibû revandin û bi salan li nik DAIŞê dîl mabû.
Yekîneyên Parastina Jinê li gel Hêzên Sûrîyaya Demokratîk (HSD), Hêzên Ewlekarîya Hundirîn (Asayîş) û hêzên Hevpeymana Navdewletî ya Li Dij DAIŞê ji 25ê meha borî ve Kampa Holê ji komikên veşartî yên DAIŞê paqij dike.
Hêjayî gotinê ye ku YPJyê di 3yê vê mehê de keça bi navê Wefa Ebas rizgar kiribû.
Keça êzidî Wefa, duh duşemê, bo Yekîneyên Berxwedana Şingalê (YBŞ) hatibû radestkirin û bo Şingalê hatibû oxirkirin.
Balkêş e ku keçên êzidî yên rizgarkirî ji ber zilm û zora bi salan a DAIŞê axaftina bi zimanê kurdî ji bîr kirine û bi erebî diaxêvin.